Државниот врв на Македонија им го честита Божик на верниците што денеска го прославуваат Рождеството Христово.
Претседателката на државата, Гордана Сиљановска-Давкова, им посака на верниците добро здравје, духовен мир и радост и ги повика божикните празници да бидат поттик за чинење добри дела и заемно почитување.
Премиерот Христијан Мицкоски, во божикната честитка, порача дека празничните мигови треба да бидат потсетник за обединување, бидејќи, како што рече, заеднички може да се изгради држава во која секој граѓанин ќе се чувствува ценето, заштитено и исполнето, со надеж за поубава иднина.
Честитка до верниците испрати и претседателот на Собранието, Африм Гаши, посакувајќи им празничните денови да ги поминат во добро здравје, семејна топлина, спокој, надеж и оптимизам за годината што претстои.
Претседателот на СДСМ, Венко Филипче, во честитката по повод Божик порача дека ова е празник на надежта, љубовта и заедништвото. „Овој голем празник нè потсетува дека само со солидарност, меѓусебна почит и грижа едни за други можеме да изградиме поправедно и похумано општество, во кое секој граѓанин ќе има еднакви можности и сигурна иднина“, порача Филипче во честитката.
