Сејф Сити нема да ги лови само брзите возачи и минувачите на црвено. До крајот на годинава безбедносниот систем ќе регистрира и ќе казнува за погрешно паркирање и непрописно вртење на места каде што тоа не е дозволено. Министерот Тошковски е задоволен од досегашните ефекти од воведувањето на системот, кој донесе не само помалку сообраќајки, туку и помала црна статистика.
„Мислам дека треба да одиме чекор по чекор, да сме сигурни дека она коешто го имплементираме е функционално и дека ги дава очекуваните резултати, не само од аспект на намалување на бројот на повредени луѓе и намалување на бројот на жртви, туку и од аспект на намалување на судските постапки.“, изјави министерот за внатрешни работи Панче Тошковски.
За поголем ред и безбедност засилени се контролите и мерките против моторџиите. Во подготовка се законски измени со кои казни ќе може да има и за електричните тротинети.
„Ако јас лично се прашувам, јас би ги забранил тротинетите да се управуваат во Македонија. Електричните тротинети. Но, ќе оставам во рамки на една дебата, предлози итн. Да најдеме соодветно решение, тргнувајќи од аспект на повредени лица, тешко телесно повредени лица, загинати лица. Јас би ги забранил целосно.“, изјави министерот за внатрешни работи Панче Тошковски.
Како дел од зајакнувањето на сообраќајната контрола е и Предлог-законот за возила, кој ќе го намали просторот за злоупотреби и при регистрација и при технички преглед. Најголем удар со новите законски измени се очекува да добијат манипулациите при продажбата и регистрацијата на возила.
Освен што ќе лови минувачи на црвено светло и брзи возачи, Сејф Сити ќе казнува и погрешно паркирање и непрописно управување со возилото.
Бојан Таневски
