За само два дена во САД, Христијан Мицкоски и владината делегација направија повеќе за македонската дипломатија отколку што се има направено во изминатава декада. Продор на американското политичко поле, остварувајќи одлични контакти со новата американска администрација, што ниедна власт досега не успеала да го стори. Според експертите Македонија треба да ја искористи оваа можност за зајакнување на своите позиции и ставови.
-Средбите се извонредни, досега Македонија немала такви врски со ниту една американска администрација и веројатно нема ни во иднина да има. Така да, тоа е еден наш мал продор на американското политчко поле и јас мислам дека ќе имаме шанси да го искористиме, вели за Алфа поранешниот амбасадор Ристо Никовски.
Работната посета на Вашингтон владината делегација реши да ја искористи за низа средби со блиски соработници на Трамп, но и со бизнисмени, со цел да ги презентира можностите за инвестирање во Македонија. Никовски вели ова покажува дела се води многу поразлична дипломатија за разлика од онаа на претходната власт, која според многумина беше одбележена со понизност кон соседите.
-Новата власт прв пат после седум- осум години отворено на меѓународен план се бори за нашите интерси, ги пласира нашите желби и потреби во суштина и веќе постигнува одредени резултати, иако тоа е една извонредно тешка борба, еден предизвик невиден, но тие се на прав пат, изјави Никовски.
Дел од луѓето и медиумите блиски од опозицијата минатиов период работната посета на Мицкоски на САД се обидуваат да ја прикажат дека била воопшто неважна. Според Никовски вакво нешто е очекувано и е знак на љубомора. Вели, освен кај СДСМ, ја има кај соседите, поради фактот што Мицкоски беше единствениот лидер од Балканот присутен во Вашингтон.
-Не само опозицијата и во Бугарија веќе љубомора покажаа на ова што се случува, бидејќи единствен од Балканот кој што е присутен на овие свечености е нашиот премиер и неговата делегација. Мислам дека од тоа ќе произлезат интересни работи за Македонија, корисни работи за Македонија и на политички план да се надеваме и на економски план, изјави Никовски.
Според познавачите секое вакво пробивање меѓу највлијателните луѓе во една од најмоќните држави во светот е успех за цела држава, за сите Македонци, а не само за Мицкоски и ВМРО-ДПМНЕ. Секоја поддршка од најмоќните за македонските ставови и борба, наспроти антимакедонските е добредојдена, посакувана и неопходна.
Матеја Петровски
