Заменик-министерот за надворешни работи и надворешна трговија Зоран Димитровски денеска ги прими копиите од акредитивните писма на новоименуваната амбасадорка на Република Ерменија во Македонија, со седиште во Софија, Цовинар Хамбарџумиан, информираат од МНРиНТ.
Посакувајќи ѝ успешна дипломатска мисија, заменик-министерот Димитровски изразил уверување дека за време на нејзиниот мандат ќе продолжи позитивниот тренд во развојот на билатералните односи и ќе се интензивира севкупната соработка меѓу двете земји.
– Во разговорот беше потврдена заедничката определба за натамошно унапредување на економските односи преку зајакнување на активностите за развој на трговската и деловната соработка помеѓу двете земји, како и преку иницирање нови активности за поттикнување на соработката во областа на туризмот – се вели во соопштението од МНРиНТ.
Соговорниците изразиле и подготвеност за натамошно продлабочување на политичкиот дијалог преку организирање билатерални посети и редовни политички консултации помеѓу двете министерства за надворешни работи во наредниот период.
На средбата биле разменети мислења и за актуелни прашања од меѓународен карактер.
