Да се знае каде одат парите и дали има ефекти врз економијата. Министерката за финансии Гордана Димитриеска Кочоска е децидна дека средствата дадени како државна помош треба да се следат каде завршуваат и дали тие потоа имаат резултат, односно придонесуваат за раст. Министерката вели дека бидејќи се уште нема систем, односно се работи на решение кое централизирано ќе ги покажува потрошените пари, треба да зајакнат механизмите за контрола. Таа потенцира дека политиката на Владата се темели на фискална консолидација и забрзан економски раст.
– Државната помош не смее да биде товар врз јавните финансии, туку инвестиција во конкурентноста и одржливиот раст. Таа опфаќа разни области и значаен обем на средства. Според податоците на Комисијата за заштита на конкуренцијата, во 2023 година државната помош изнесувала 206 милиони евра или речиси 1,5 процент од БДП, а во 2024 година достигнала 235,2 милиони евра или 1,52 процент од БДП. Овие износи ја нагласуваат важноста на овој инструмент, но уште повеќе ја потенцираат потребата од високо ниво на транспарентност и отчетност. Економските показатели покажуваат дека поддршката за инвестиции има позитивни ефекти врз економската активност – потенцира министерката.
Во моментов податоците за доделените пари како субвенции , социјална помош, детски додатоци, поддршка за странски инвеститори и слично ги имаат разни надлежни институции и не се достапни на едно централизирано место. Од економскиот институт Фајненс Тинк велат дека убедливо најмногу пари се трошат на земјоделски субвенции. Последните податоци покажуваат дека во 2024 година државната помош достигнала 235,2 милиони евра или 1,52 процент од БДП.
Истражувањата покажале дека најдобар систем во Западен Балкан за следење на трошењата на буџетските пари како државна помош има Црна Гора. Најголеми износи се трошеле за време на пандемијата и енергетската криза, по што сумите постепено се намалувале поради закрепнувањето на економиите.
