Двајца повредени од страотната несреќа кај Катланово се борат за живот на КАРИЛ. А уште двајца, се хоспитализирани и се стабилни – сите се на интензивна нега, информираат од Клиниката. Еден од повредените е во старата градска болница со тешки телесни повреди.
“Сите четворица пациенти се хоспитализирани во Единицата за интензивно лекување и сите се со тешни телесни повреди, од кои двајца се во критична состојба. Двајца од нив се оперирани веднаш по приемот. Лекарските тимови кои од синоќа се дополнително зајакнети се борат за нивниот живот и го пружаат потребниот здравствен третман и нега”, велат од КАРИЛ.
Во ужасната сообраќајка тројца велешани трагично го изгубија животот.Жртвите се од 37 до 66 години.Засега не се познати причините како патничкото комбе се преврело на патот. Она што е познато е дека луѓето се враќале од работа.
Од Обвинителството информираат дека се преземаат дејствија за утврдување на причините за сообраќајката.
„Комбето е подигнато од местото на несреќата и ќе се врши и вештачење со цел да се испитаат сите околности кои довеле до настанот“, велат од ОЈО.
Утрешниот ден општина Велес го прогласи за Ден на жалост поради трагичната смрт на тројцата сограѓани.Како што информират знамињата ќе бидат на половина копје, и сите културни и спортски манифестации закажани за утре се одложуваат.
