Делегација на Собранието на Македонија од денеска до 24 април ќе учествува на вториот дел од редовната сесија на Парламентарното собание на Совет на Европа (ПССЕ) во Стразбур – соопшти денеска собраниската прес-служба.
Делегацијата, како што е наведнео, е предводена од заменик-претседателката Иванка Василевска, а во состав се и Беким Ќоку и Бисера Костадиновска-Стојчевска. Обраќања ќе имаат Денис Беќировиќ, претседавач со Претседателството на Босна и Херцеговина, и Жан-Ноел Баро, министер за Европа и надворешни работи на Франција.
Меѓу поважните дискусии на сесијата, според информацијата, ќе бидат дебати посветени на насилството и говорот на омраза насочени кон политичарите, целосното укинување на смртната казна, како и заштитата на слободата на религија и уверување во Европа.
– Ќе се одржи и заедничка дебата за унапредување на спроведувањето на Истанбулската конвенција, насочена кон спречување и борба против насилството врз жените. Во рамките на оваа дебата ќе придонесе и Ана Редондо, министерка за еднаквост на Шпанија, при што учесниците ќе разгледуваат начини за поттикнување на култура на согласност – соопшти Собранието на Македонија.
Дополнително, како што е наведено, ќе се одржи церемонија, на која ќе биде доделена Наградата за музеј на Советот на Европа за 2026 година на Young V&A во Лондон, посебен простор на музејот „Викторија и Алберт“ наменет за деца, млади и семејства.
– Михај Попшој, заменик-претседател на Владата и министер за надворешни работи на Република Молдавија, ќе одржи презентација за работата на Комитетот на министри, извршното тело на Советот на Европа, и ќе одговара на прашања од членовите на Собранието. Генералниот секретар на Советот на Европа, Ален Берсе, исто така ќе одговара на прашања, а комесарот за човекови права, Мајкл О’Флаерти, ќе го претстави својот годишен извештај за активности за 2025 година – стои во соопштението.
Други точки на дневниот ред, додаваат, ќе опфатат следење на приходите од криминал, посочени од Сергеј Магнитски, справување со социјалниот дампинг и експлоатацијата на трудот, како и обезбедување ефикасно спроведување на авторските права.
Собранието треба да расправа за процедурите за избор на судии во Европскиот суд за човекови права и ќе ги разгледа своите набљудувања во врска со предвремените избори за Собранието на Косово.
