Јавната локална библиотека „Илинден“ од Делчево објави јавен повик преку кој се повикуваат граѓаните да предложат жени од Делчево кои, според нив, заслужуваат да бидат дел од изложба на фотографии и инспиративни животни приказни.
Како што информираше директорката на библиотеката Билјана Петровска, активноста е организирана во чест на жените кои со својата работа, хуманост, храброст, талент и посветеност оставиле и сè уште оставаат значаен белег во локалната заедница.
– Во чест на жените кои со својата работа, хуманост, храброст, талент и посветеност оставиле и сè уште оставаат траен белег во нашиот град, ЈЛБ „Илинден“ – Делчево подготвува изложба на фотографии и приказни за инспиративни жени од Делчево. Ги повикуваме сите граѓани да предложат жени кои според нив заслужуваат да бидат дел од оваа изложба – жени од различни области: образование, култура, спорт, медиуми, здравство, хуманитарна работа, уметност, претприемаштво, семеен живот, активизам и секојдневни тивки предизвици што го прават нашето општество подобро и похумано, истакна Петровска.
Предлозите треба да содржат име и презиме на личноста, како и кратко образложение зошто таа заслужува да биде дел од изложбата. Граѓаните своите предлози можат да ги испратат преку коментар или порака на фејсбук-страницата на библиотеката.
По завршувањето на јавниот повик ќе биде извршена селекција, по што ќе бидат избрани жените кои ќе станат дел од изложбата.
Од библиотеката посочуваат дека целта е да се раскажат токму оние големи, а тивки приказни на жени кои секојдневно придонесуваат за подобро и похумано општество во Делчево.
