Илјадници велигденски украсени јајца, разновидни рачни изработки и традиционални слатки специјалитети беа изложени денеска на Велигденската изложба поставена пред летната сцена во Делчево, каде граѓаните го одбележаа Велики четврток преку негување на христијанската традиција.
На десетина штандови, учесниците ја претставија својата креативност инспирирана од Велигден – празник кој ја симболизира победата на животот над смртта.
-Со свои изработки се претставија ученици, воспитувачи и членови на повеќе институции и здруженија, меѓу кои основните училишта „Ванчо Прке“ и „Св. Климент Охридски“, средното училиште „М.М.Брицо“, детската градинка „Весели цветови“, Општинската организација на Црвениот крст, фолклорната група „Копачка“, ЈЛБ „Илинден“ и здружението „Серафина“, информираа од Општина Делчево.
Изложбата имаше и хуманитарен карактер, а стручна комисија ги награди најуспешно уредените штандови.
-Првата награда во износ од 3.000 денари ја освоија учениците од прехранбената насока при СОУ „М.М.Брицо“. Втората награда, во висина од 2.000 денари, ѝ припадна на детската градинка „Весели цветови“, додека третата награда од 1.500 денари ја добија учениците од ООУ „Ванчо Прке“. Посебна пофалница за учество беше доделена на ЗФГ „Копачка“ за штанд со етномотиви и промоција на традицијата, додадоа од Општината.
Во рамки на настанот се одржа и културно-уметничка програма, во која настапи фолклорната група „Никола Јонков Вапцаров“.
Велигденската изложба произлегува од традицијата поврзана со Велики четврток, ден кога започнува Христовото страдање. Според обичајот, првото бојадисано јајце треба да биде црвено, симболизирајќи ја Христовата крв.
