Грејната сезона во Скопје официјално започна, но топлината во домовите не ја почувствуваа сите граѓани подеднакво. Дел од скопјани утрово ги дочекаа првите млаки радијатори, но кај други топлата вода воопшто не ни протекла до грејните тела.
Жители на Карпош и Капиштец реагираат дека немаат централно греење на стартот на сезоната. .. Центарци пак се задоволни, радијаторите грееле кај оние кои ги сретнавме денеска.
„Општа мизерија, како не им е срам само. Видете кај мене има сега, но тоа е многу слабо. Не сум задоволен воопшто. Живеам во Карпош 3… Па немаше да ти кажам уклучено. Во Капиштец живеам…. Не не, така ептен млако, тука во Карпош сум јас….Не се надевав дека ќе има, млакичко, но добро, синоќа немаше, но, проверив сабајле околу 7 веќе затоплено беше…. Па со оглед на времето добро беше. Но, луѓето претежно се жалат од тоа што имам слушнато….. Не, не немам парно, се греам на термо. Па добро моментално се уште е рано, но се подготвуваат, но ќе биде, секоја година е добро….
Правилникот за снабдување со топлинска енергија налага радијаторите да грејат кога надворешната темппература е под 12 степени, а во домот треба да биде обезбедена топлина од најмалку 21 степен.
„Испораката на топлинска енергија ќе се одвива секојдневно согласно строго утврдените правила и дијаграми што зависат од атмосферските услови и надворешните температури. Според правилата, во месец октомври и првата половина од ноември, кога временските услови често се менуваат, снабдувањето со топлинска енергија ќе зависи од температурата на воздухот“, велат од ЕСМ.
Дополнителна грижа кај скопјани предизвикува и најавата од ЕСМ дека од 13 до 17 октомври е можен прекин или намалување во испораката на гас поради ремонт на регионалните гасоводи и „Турски тек“. Сепак, од компанијата уверуваат дека расположливите количини на гас ќе бидат доволни за непречена испорака на топлинска енергија, а евентуалните краткотрајни редукции нема значително да го нарушат комфорот на потрошувачите.
Од ЕСМ апелираат граѓаните да обезбедат пристап до топлинските станици и навреме да пријават евентуални дефекти. Во Скопје преку системот на компанијата се опфатени 62.600 активни корисници, кои очекуваат топлината оваа есен рамномерно да стигне во сите делови на градот.
