– Дел од просторот на Полициската станица за граничен надзор во долнореканското село Жировница ќе биде уреден во паркинг простор од јавен интерес, решение со кое треба и двете засегнати страни да функционираат непречено.
За таа цел, по барање на градоначалникот на Општината Маврово и Ростуше, Онер Јакупоски, заедно со претседателот на Советот на општината, Елвир Пајкоски, претставници на Министерството за внатрешни работи и локалното население, остварена е работна посета во село Жировница.
-Од оваа конструктивна теренска посета со задоволство можеме да го известиме локалното население во село Жировница дека Министертвото за внатрешни работи, ја поддржа ваквата иницијатива и даде позитивно мислење. Договорени се сите активности за отпочнување на процедурата од правено-нормативен аспект, а во наредниот период ќе следува подготовка на соодветна проектна документација, како и спроведување на постапка за пренесување на правото на сопственост на предметниот простор на Општина Маврово и Ростуше- информираше Фикрет Ибраими, одговорен во Секторот за односи со јавноста во општината.
Според него во рамки на посетата било разговарано и за други прашања од интерес за жителите на Жировница.
-На барање на Месната заедница во наредниот период ќе се отпочне со целосна дислокација на постојаните контејнери, со цел подобрување на хигиенските услови, поуредна животна средина и поквалитетна организација во собирањето на комуналниот отпад. Општина Маврово и Ростуше останува посветена на реализација на преземените и ветени проекти и активности кои придонесуваат за подобар квалитет на живот на сите граѓани, посочи Ибраими.
Ваквото решение го поздравија жителите на селото, меѓу кои и Латиф Пајкоски, кој е претседател на Сојузот на Македонците со исламска религија (СМИР), кој рече дека голем простор од кругот на Полициската станица, сега ќе биде во услуга на потребите на локалното население, а ќе биде надминат и проблемот со паркинг места во летниот период која печалбарите масовно доаѓаат во родното место.
