Градоначалничката Данела Арсовска ја презема партијата на Ѓорѓи Оровчанец – Нова Алтернатива, дознава „Нетпрес“. Повикувајќи се на нивните извори, Арсовска не можела да собере потписи за регистрација на нова партија. Тоа, наводно го направила со инсталирање на свој човек, како нов претседател на партијата, а ќе делува од сенка, додека формира терен за официјализирање на својата партија. Исто така, изворот на „Нетпрес“ не ја исклучува ниту можноста Нова Алтернатива да и’ е отстапена на Данела Арсовска за одредена финансиска надокнада.
Какви се плановите на партијата, дали ќе настапува на претстојните избори, ако настапува, дали тоа ќе биде самостојно или во коалиција – ова се прашања кои до сега немаат одговор, пишува „Нетпрес“. Според досегашните објавени информации во медиумите, партијата на Арсовска ќе се вика Правда, а седиштето на партијата е на локација каде што се наоѓаат фирмите на нејзиниот близок соработник Драган Митковски.
Инаку, партијата Нова Алтернатива пред извесно време и доби нов претседател, за првпат откако е формирана во 2007 година. На местото на Оровчанец е поставен Сократ Ефтимовски. Нова Алтернатива која од 2008 година е во коалицијата предводена од СДСМ, речиси и да нема никаква развиена мрежа и партиска структура.
Дека има амбиции за нејзина партија, Арсовска објави неодамна, во телевизиско интервју, откако долг период во јавноста имаше гласини за тоа, а дури се споменуваа и лица кои би се нашле на нејзината партиска листа – дел од нејзините сегашни блиски соработници во градската власт.
