Премиерот Христијан Мицкоски е подготвен да разговара со новиот бугарски премиер Росен Жељасков, но Македонија има црвени линии од кои нема поместување. Според познавачите, државава конечно нуди долгорочни решенија, кои ќе гарантираат дека во иднина билатералните проблеми, конечно нема да ни бидат пречка на европскиот пат. Дипломатот Зоран Бабиќ за Алфа вели дека новиот пристап на македонската власт е позитивна промена за разлика од претходно, бидејќи само на рамноправни основи во било какви преговори може да има напредок во односите меѓу Македонија и Бугарија.
-Дистрибутивниот пристап на Бугарија не нуди долгорочни решенија, тоа нуди решенија помалку или подолго меѓутоа со лимитирано важење, бидејќи едната страна нели не е задоволна и тоа ќе тлее и ќе доведе до нови ситуации кои не се сакани и проблеми. Интегрираниот тек на преговори како што ние се обидуваме да ги наметнеме навистина води и треба да води кон една поширока слика, кон едно зближување на народите од двете држави, но на рамноправни основи, изјави Дабиќ.
Токму поради погрешниот пристап и прифатените отстапки минативе три децении Македонија се доведе до оваа состојба, односно поради условувања од соседите добиваме блокади на европскиот пат. Според Дабиќ токму тоа се грешките кои биле направени од нашата независност, а од кои лекција научила сегашната владина гарнитура. Вели тајмингот и динамиката во преговорите значат некогаш најмногу во дипломатијата, а ние на тоа поле сме биле лоши во минатото.
-Во раните 90-ти значи пред 30 години Македонија во желба да ги задоволи барањата на соседите најпврив го смени знамето, потоа го смени Уставот со одредби дека нема да се меша во внатрешните работи на соседните земји. И трето, јас мислам најголемите концеција што ја дадовме е таа што прифативме да разговараме за нашето име, изјави Дабиќ.
Според Дабиќ доказ за промената во македонската дипломатија е и работната посета на премиерот Мицкоски и владината делегација на САД, каде што беа остварени низа средби со блиски соработници на администрацијата на новиот претседател на САД.
-Ова е нешто што мислам дека досега не е сторено. Нашата дипломатија пенетрира во телото кое без разлика дали утре ќе биде оваа институција или онаа, но ќе биде околу претседателот Трамп. И тука не можам да видам ништо лошо, туку напротив можам да видам дека се подготвува терен за едно американско внимание кон нас, изјави Дабиќ.
Според познавачите последниве години понизноста беше заштитен знак на македонските власти во дипломатските односи. Сметаат дека добро е што состојбата конечно се менува и Македонија јасно ги кажува своите ставови во заштитата на националните интереси и градењето на сигурен пат во евроинтеграциите.
Матеја Петровски
