Со само една понуда склучени договори во постапки за јавни набавки, вредни 283 милиони евра, и тоа за само половина година, објавува Центарот за граѓански комуникации, во најновиот Извештај од мониторингот за јавни набавки.
-Во нетранспарентната постапка со преговарање без претходно објавување оглас, во првото полугодие од 2023 година склучени се договори во вкупна вредност од околу 11 милиони евра. Дури 91 % од овие договори се склучени во преговори со само една фирма. Најголема вредност на овој вид договори има АД Електрани, велат од Центарот.
Според клучните наоди од набљудувањето и од т.н. Индекс на рационалност, просечниот број на понуди во јавните набавки се намалува, односно во мониторираниот период, од јануари до јуни минатата година, паднал на 2.8 наспроти 3, колку што изнесувал во 2022 година. Клучна забелешка е дека отсуството на конкуренција е особено загрижувачко во здравството.
-Одлуките што се донесуваат при спроведувањето на јавните набавки не се соодветно и прецизно образложени што фрла сомнеж врз објективноста и законитоста на постапувањата. Ова главно се однесува на одлуките за отфрлање на доставените понуди и за поништување на тендерите, се наведува во клучните наоди на Индексот.
Во значаен дел од постапките, како што се наведува таму, не се утврдуваат количините на она што се набавува, со што, се оневозможува фирмите, како што посочуваат, да понудат пониски цени за поголеми количини на набавка. Според ова, се овозможуваат манипулација и злоупотреби во фазата на реализацијата на договорите.
