Цената на нафтата се искачи на највисоко ниво во трите последни недели, достигнувајќи 94 долари за барел. Континуираниот раст е резултат на неизвесноста на конфликтот на Блискиот Исток, кој не покажува знаци дека ќе биде разрешен со преговори во скоро време. Американскиот претседател Доналд Трамп најави жестоки мерки за Техеран кои ќе ги опфатат сите нивни трговски елементи, тврдејќи дека им дал повеќе можности за мировен договор.
„Шверц на нафта, линии за размена, трансфери на готовина, менувачници, бродски регистри, компании-параван – сето ова мора веднаш да престане. Знаете кои сте. Никој не ѝдаде на Исламската Република Иран поголема можност да постигне договор од мене. Трагично за нив, тие не ја искористија“, изјави претседателот на САД Доналд Трамп.
Најновата стратегија на САД за отворање на Ормускиот Теснец кој е клучен за превезување на нафтата, е голем економски притисок врз Иран. Наместо напади со дронови и ракети, американската влада се заканува со „економска изолација каква што светот никогаш не видел“. Таа планира значително да ги засили санкциите врз Иран како и врз сите негови трговски партнери од кои еден од најважните е Кина.
„Исто така, денес објавувам дека секоја земја што им дозволува на своите финансиски институции, компании, аеродроми или владини агенции да обезбедат каква било форма на помош на Иран ќе се соочи со огромни економски последици. Ова ќе биде економски Ден-Д и потребна ни е поддршката од сите наши сојузници за да ја изолираме и победиме иранската закана заедно со Соединетите Американски Држави.“, изјави Трамп.
Детали за американскиот план се очекуваат во понеделник и како што стојат работите не даваат многу надеж за отворање на теснецот, бидејќи веќе со месеци тие ионака вршат голем економски притисок врз Техеран, а војната се наближува до шестиот месец.
