Паника во истражниот затвор во Шутка. Луѓето кои се зад решетки во притворското одделение живеат во константен страв и бараат помош откако почина затвореник, кај кој е докажано присуство на Ковид-19.
Од истражниот затвор известија дека притвореникот починал од срцев удар, но подоцна се утврдило дека бил позитивен на вирусот. За сега не е познато како или од кого се заразил.
Затоа, медицински екипи од институтот за јавно здравје уште вчера почнале да земаат брисеви од сите затвореници, но и од чуварите во затворот.
Сепак, тоа не ги смири затворениците кои во текот на ноќта во знак на незадоволство и загриженост фрлаа чинии од прозор.
На ова видео кое го објави „Тетова сот“ се гледаат фрлените чинии, а од Управата за извршување на санкции потврдија дека пластичните чинии кои се на видеото навистина им припаѓаат на луѓето од затворот и дека тие се користат во ќелиите.
Затворениците бараат и кај нив да бидат воведени посебни заштитни мерки, а во спротивно се заканија и дека ќе почнат штрајк со глад.
Директорот Есад Рахиќ за Алфа тврди дека ситуацијата е под контрола и дека затворот се дезинфицирал претходно, а се дезинфицира и сега. Тој додаде дека резултати од тестираните затвореници ќе ги соопшти во понеделник.
Инаку, шесте чувари кои биле во контакт со притвореникот и биле таму кога се констатирала смртта, веднаш по добивањето на резултатите се испратени дома во изолација.
Починатиот дошол во затворот на 8-ми март со притвор за полесно кривично дело и требало за неколку дена да биде пуштен на слобода.
Симона Србиноска
