Три трофеи, девет златни и осум сребрени медали освоија охридските „генијалци“ на неодамна одржаниот 16 по ред Меѓународен Бреинобреин-абакус натпревар.
Тоа е одличен резултат, дотолку повеќе што 20-те учесници од Центарот за развивање животни вештини при Црвениот крст се натпреваруваат во мошне силна конкуренција од 23.912 учесници од 79 земји од светот.
Од охридскиот Црвен крст посочуваат дека и овој пат интернационално мерливите резултати покажале и потврдиле дека охридските бреинобреин генијалци се меѓу најдобрите во светот.
-Успехот се должи на посветеноста, вложениот труд и упорната работа на децата, на несебичната и професионална посветеност на тренерите и на поддршката од родителите. Овој успех претставува потврда дека одиме по вистинскиот пат со имплементација на Бреинобреин програмата, фокусирани на подобрување на излезните развојни резултати кај децата и градење поттикнувачки амбиент за учење преку креирање мотивација и позитивен пристап кон учењето, кој им помага на децата да развијат вештини, знаења, компетенции, самодоверба и чувство на социјална одговорност – велат од Црвен крст – Охрид.
