– По повод Денот на независноста – 8 септември денеска познатата статуа „Манекен пис“ во центарот на Брисел беше облечена во традиционална македонска народна носија.
Церемонијата започна во Градското собрание на Брисел, каде обраќање имаа шефот на македонската Постојана мисија при ЕУ, амбасадорот Зулфи Исмаили, како и претставник на бриселските локални власти.
Во рамки на настанот беше одржана презентација на носијата, по што следуваше и нејзино официјално предавање од амбасадорот Исмаили на градоначалникот на Брисел, Филип Клосе.
На церемонијата присуствува претставници на општествениот и културниот живот на Брисел и на македонската дијаспора и дипломатските мисии во Белгија, меѓу кои и постојаниот претставник на земјава во НАТО, амбасадорот Орхан Муретзени и в.д амбасадорката во Белгија, Сузана Мехмеди.
По ова следеше процесија на пренесување на носијата од зградата на Градското собрани, што се наоѓа на плоштадот Гран плаз, до фонтаната статуата „Манекен пис“, каде статуата беше облечена во македонската носија.
Во Брисел постои традиција за облекување на „Манекенот пис“ разни облеки по повод домашни или странски празници или настани, но ова е првпат статуата да биде во македонска носија.
Иако, симболичен, овој чин воедно е можност за претставување на пред македонското културно наследство пред Европа.
Статуата, висока 55 сантиметри, е изградена во честа на момче, кое според легендата, го спасило Брисел од пожар, гаснејќи го запалениот фитиљ на експлозивот уринирајќи врз него. Токму затоа бронзената статуа на момче со непоколеблив став е одраз на слободарски, независен и бунтовен карактер.
