Одржливото управување со ресурсите не е избор, туку императив во време на глобални енергетски и климатски предизвици, порача министерката за енергетика, рударство и минерални суровини, Сања Божиновска во своето обраќање на UNECE Resource Management Week 2026, пред високи претставници, експерти и креатори на политики од целиот свет.
-Се наоѓаме во период на длабока и неповратна трансформација на енергетскиот и ресурсниот систем. Предизвиците како климатските промени, енергетската сигурност и економската отпорност се меѓусебно поврзани, но и можностите што произлегуваат од нив можат да бидат двигател на одржлив развој – доколку делуваме заеднички- истакна министерката.
Таа нагласи дека Македонија во изминатиот период направила значаен институционален исчекор со формирањето на Министерството за енергетика, рударство и минерални суровини, како клучен чекор за зајакнување на стратешкото управување со енергетските и природните ресурси.
-Ова не беше административна, туку стратешка одлука со која енергетиката ја поставивме во срцето на националната политика- потенцираше Божиновска.
Министерката посочи дека веќе се реализираат конкретни резултати преку развој на клучни инфраструктурни проекти, како гасното поврзување со Грција и планираната интерконекција со Србија, со што се зајакнува енергетската безбедност и регионалната интеграција.
Паралелно, државата интензивно работи на зголемување на инвестициите во обновливи извори на енергија, особено во соларни и ветерни капацитети, како и на подобрување на енергетската ефикасност. Во рударскиот сектор, фокусот е ставен на одговорно и одржливо искористување на ресурсите, во согласност со меѓународните стандарди.
Во своето обраќање, Божиновска ја нагласи и важноста на мултилатералната соработка, истакнувајќи дека ниту една држава не може самостојно да ги надмине предизвиците на енергетската транзиција.
-Меѓународната соработка не е опција – таа е неопходност. Само преку партнерства, размена на знаење и заеднички политики можеме да обезбедиме одржлива и сигурна иднина-наглаи таа.
Како потврда за активната улога на земјата на меѓународната сцена, министерката потсети дека Македонија беше домаќин на 14-тиот Меѓународен форум за енергија и одржлив развој во Скопје, со што ја зацврсти својата позиција како кредибилен партнер и регионален центар за дијалог.
Божиновска упати повик за засилена соработка и побрза акција, додавајќи дека „имаме знаење, имаме алатки и имаме можност – но потребна е решителност и единство. Одржливоста не е крајна цел, туку процес што бара визија, доследност и партнерство.“
Со учеството на овој значаен меѓународен настан, Македонија уште еднаш ја потврдува својата посветеност кон одржлив развој, енергетска сигурност и активна улога во глобалните процеси за справување со климатските и енергетските предизвици.
