Нашата цел е јасна, да имаме модерна, стабилна и одржлива енергетика. Но уште појасна е вистината – иднината на енергијата не ја создава машината, туку луѓето – истакна министерката за енергетика, рударство и минерална ресурси, Сања Божиновска, на промотивниот настан „Вештина на иднината“, организиран од АД ЕСМ, а се одржа во Битола.
Пред вработените на АД ЕСМ, претставници на Универзитетот „Св. Климент Охридски“, како и претставници на Европската банка за обнова и развој (ЕБОР), министерката Божиновска нагласи дека програмата „Вештина на иднината“, реализирана со поддршка на ЕБОР и меѓународните партнери, покажа дека модерната енергетика почнува токму тука, со луѓето.
– Енергетската трансформација не почнува со технологијата, таа почнува со луѓето. Можеме да градиме капацитети, можеме да инвестираме во инфраструктура, да носиме стратегии, но без знаење и обучени професионалци, трансформацијата ќе остане само еден план на хартија. Програмата „Вештина на иднината“, реализирана со поддршка на ЕБОР, и меѓународните партнери, покажа дека модерната енергетика почнува токму тука, со луѓето. Над 600 вработени во АД ЕСМ стекнаа нови знаења и компетенции за да управуваат со промените што доаѓаат, со тоа институцијата станува посилна, поотпорна и подготвена за предизвиците што следуваат, а државата добива посигурен и постабилен енергетски систем. Вложувањето во знаења е еднакво важно како и вложувањето во новите енергетски капацитети. Енергетската трансформација е процес што бара постојано надградување, партнерство и доверба. Модернизацијата не се случува сама, таа се учи, се гради и се води – рече Божиновска.
На промотивниот настан во Битола заменик-генералниот директор на АД ЕСМ, Реџеп Асани, потврди дека со стекнатите вештини вработените ќе бидат поефикасни во секојдневните процеси, ќе се обезбеди одржлив раст на компанијата и најави нови проекти.
– Оваа година почнуваме со реализација на три капитални проекти од зелената агенда. Ќе градиме три фотонапонски електрани, кои ќе го зајакнат производното портфолио на АД ЕСМ и ќе влијаат на зголемување на домашното производство на електрична енергија од обновливи извори, а веќе е во тек и теренска реализација на втората фаза од ветерниот парк „Богданци“ – истакна Асани.
На учесниците во програните за обука им беа доделини сертификати.
