Министерката за енергетика, рударство и минерални суровини Сања Божиновска денеска имаше средба со студентите инженери од проектот „Македонска формула“ – тимот MES Racing, првиот и единствен македонски Formula Student тим, кој успешно ја претставува државата на меѓународната инженерска и технолошка сцена.
На средбата, информираат од Министерство за енергетика, рударство и минерални суровини, студентите ги презентираа својот проект, визијата и досегашните активност преку кои младите инженери стекнуваат практични знаења и работат по принципи на реална инженерска компанија развивајќи иновативни решенија и современи технологии. На проектот работат четириесетина студенти од разни факултети и секој во рамките на својата област дава придонес за развој на овој проект.
Министерката, се додава, ја нагласи важноста од континуирана институционална поддршка за младите инженери потенцирајќи дека инвестицијата во нивното знаење, креативност и иновации е директна инвестиција во иднината на државата. Таа истакна дека ваквите студентски иницијативи се од исклучително значење за развојот на техничките науки, јакнењето на домашниот инженерски кадар и задржувањето на младите таленти во земјата.
– Наш приоритет е да создадеме средина во која младите инженери ќе бидат охрабрени, поддржани и мотивирани да ги развиваат своите идеи и иновации. Проектите како „Македонска формула“ покажуваат дека Македонија има знаење, визија и потенцијал да биде дел од европската и светската инженерска заедница – истакна Божиновска.
Од тимот MES Racing нагласија дека поддршката и соработката со институциите претставуваат значаен поттик за понатамошен развој на студентското инженерство, како и за унапредување на практичната едукација и технолошките капацитети во земјата.
