Националната установа Завод и Музеј Битола претставувана од директорката Маргарета Спасов и д-р Ирена Ружин учествуваа на годишната конференција на НЕМО (Network of European Museum Organizations) во Вилниус, Литванија.
Конференцијата се одржа во Националниот музеј-Палатата на големите војводи на Литванија, каде меѓу 330 музејски професионалци од 41 држава, присуствуваа и претставниците на битолскиот Музеј.
-Во Вилниус се разменуваа идеи за начинот како музеите да се справат со предизвиците со вештачката интелигенција, која е сè повеќе присутна во секојдневната работа, за довербата на јавноста и сајбер-безбедноста. Низ практични работилници и конкретни примери од музејската практика, врвни експерти од Европа го пренесоа своето знаење и искуство од областа на вештачката интелигенција и сајбер-безбедноста, информираа од НУ Завод и Музеј Битола.
За време на престојот во Вилниус, битолските претставници ја промовираа македонската национална установа, учествуваа на интерактивни работилници и остварија нови контакти со колеги од Европа кои им ги овозможи тимот на Network of European Museum Organizations.
