Пред почетокот на летото, системот безбеден град ќе почне да функционира и во туристичките центри Охрид и Струга. Во двата града првично ќе бидат поставени 40 камери кои значително ќе ја подобрат безбедноста, посебно во шпицот на сезоната кога, како што велат охриѓани, владее сообраќаен хаос, а по улиците неконтролирано се дивее.
- “Тоа е добра и позитивна работа која требало од порано уште да се заврши. Поединци да, ама поединци воопшто не водат рачун дека е црвено, излегуваат директно од улици на главна улица и се без возачка култура. – Би требало да се подобри, сепак превенцијата ќе си ја заврши работата и казните. Само друго да кажам за safe city, тротоариве некогаш ќе се исчистат од возила? – Не гледам добро, ме водат други, другите можат да кажат дека навистина сообраќајната дисциплина и на пешаците и на возачите не е на ниво” – велат охриѓани.
Во моментов 4 камери се поставени на автопатот Кичево–Охрид помеѓу селата Горенци и Требеништа и Ботун и Ново Село. Тие минатата недела беа тестирани. Не е исклучена можноста на оваа делница од 57 километри да бидат поставени дополнителен број камери.
“Сè до тој момент, полициските службеници од Полициската станица за безбедност во патниот сообраќај, пред сè во пресрет на туристичката сезона, ќе вршат нагласени и интензивни сообраќајни контроли. Тоа ќе значи подигнување на степенот на сообраќајната безбедност, тоа ќе значи намалување на бројот на сообраќајните незгоди” – вели Стефан Димоски, портпарол на СВР Охрид.
Засега системот безбеден град функционира во Скопје, Куманово и Тетово, но жителите на помалите градови како Кичево сметаат дека камери треба да има секаде, не само во поголемите центри.
- “Safe city го оправдувам и уште поригорозни казни да има затоа што вакви лудории нема на планетава. Возење на црвен семафор, непочитување на пешачки. Дозволено 50–60 км на час, се вози 150. Одма возилото да му се одземе и да заборави повеќе на возило во животот. – Секаде се вози диво, претежно во овие помаливе места” – велат кичевчани.
Инаку, на магистралниот пат Ќафасан–Струга–Подмоље–Кичево–Стража се случиле 30 сообраќајки во кои 7 лица го загубиле животот, а 38 се здобиле со тешки телесни повреди. Најчести причини се преголема или неприлагодена брзина на движење, претекнување на непрегледни делови на пат и управување под дејство на алкохол.
