Во организација на Проектот финансиран од Европската Унија „Поддршка на имплементацијата на регионалните системи за управување со отпад во Источниот и Североисточниот регион“, утре во Берово ќе се одржи јавна расправа по Нацрт-извештајот за стратегиска оцена на животната средина од спроведувањето на Регионалниот план за управување со отпад за Источниот и Североисточниот регион.
Како што информираат од Општина Берово, јавната расправа ќе се одржи во зградата на Општината со почеток во 11 часот, а настанот е отворен за сите заинтересирани граѓани.
Според најавата, во рамки на расправата ќе биде презентиран Регионалниот систем за управување со отпад, при што ќе бидат образложени неговите главни карактеристики, цели и планирани активности. Дополнително, ќе биде даден и преглед на Нацрт-извештајот за стратегиската оцена на животната средина, кој ја анализира имплементацијата на Регионалниот план и неговото потенцијално влијание врз животната средина.
Од локалната самоуправа посочуваат дека подготвениот Нацрт-извештај за стратегиската оцена на животната средина, како и резимето на Планот, се јавно достапни на веб-страниците на Центрите за развој на Источниот и Североисточниот плански регион, со цел јавноста навремено да се запознае со нивната содржина и активно да се вклучи во процесот.
Организаторите упатуваат покана до граѓаните, институциите и сите заинтересирани страни да присуствуваат на расправата и со свои предлози и мислења да придонесат во процесот на планирање и воспоставување на регионален систем за управување со отпад, кој треба да обезбеди поефикасно и поодржливо управување со отпадот во двата плански региони.
