Албанскиот претседател Бајрам Бегај денеска го прими началникот на Генералштабот на македонската армија, генерал-мајор Сашко Лафчиски.
-Средбата се фокусираше на зајакнување на соработката во областа на одбраната и безбедноста меѓу двете соседни земји, сојузници на НАТО, како и на важноста на регионалната координација во услови на безбедносни предизвици, објавија од кабинетот на Бегај.
Шефот на албанската држава искажал „висока оценка за придонесот на Северна Македонија во мисиите на НАТО“.
-Во контекст на новата геополитичка динамика, претседателот Бегај ја истакна потребата од зголемување на инвестициите во безбедноста и одбраната, инвестирање во коридорот VIII, кој е од стратешко значење за регионот и Алијансата, како и зголемување на придонесите во колективната одбрана, стои во соопштението.
За посетата на македонската делегација објави и Началникот на ГШ на албанската армија Арбен Кинѓи.
-Посебно задоволство беше да го пречекам на официјална средба началникот на Генералштабот на вооружените сили на Северна Македонија, генерал-мајор Сашко Лафчиски, со кого разговаравме за најновите случувања во вооружените сили, безбедносната состојба во регионот и заедничките меѓународни придонеси во рамките на Алијансата, напиша Кинѓи и во објава на Фејсбук.
Додава дека го потврдиле значењето на зајакнувањето на воената соработка, особено во заедничките вежби и обуки.
Како дел од агендата на посетата, Лафчински оствари средба и со министерот за одбрана, Ермал Нуфи, а го посети и Полкот за специјални операции.
