Завршено е асфалтирањето на улицата Гоце Делчев во беровското село Ратево, во должина од 591 метар, со што жителите добиваат подобрени услови за сообраќај и побезбедно секојдневно движење.
Како што информираше градоначалникот на Општина Берово, Петар Ружински, проектот е реализиран со средства од општинскиот буџет за 2026 година, а неговата вкупна вредност изнесува 5.786.419 денари.
– Со реализацијата на овој проект обезбедуваме поквалитетна и современа сообраќајна инфраструктура за жителите на Ратево. Асфалтираната улица ќе придонесе за поголема безбедност во сообраќајот, полесен пристап до домовите, намалување на прашината и калта, како и подобри услови за движење во периоди на врнежи – истакна Ружински.
Покрај асфалтирањето на улицата, во рамки на проектот е изведен и канал за одведување на атмосферски води во должина од 70 метри. Дополнително, изградени се и два потпорни ѕида со вкупна должина од 60 метри, со цел да се зголеми стабилноста и безбедноста на теренот.
Од Општина Берово нагласуваат дека и во наредниот период ќе продолжат со реализација на инфраструктурни проекти во сите населени места, насочени кон подобрување на условите за живот и рамномерен локален развој.
