Интензивно се асфалтираат улиците во новата индустриска зона Речица и Новини, информираа денеска надлежните. Кумановскиот градоначалник, Максим Димитриевски објави дека во тек е асфалтирање на првиот слој на улиците во зоната.
Проектот што се реализира со средства обезбедени преку Владата опфаќа изградба на водоводна и фекална мрежа, атмосферска канализација, изградба на внатрешни сообраќајници, воспоставување на сообраќаен режим и поставување улично осветлување. Вредноста на склучениот договор со избраната компанија на тендер изнесува 208.554.681,86 денари со вклучен данок на додадена вредност.
Индустриската зона „Речица“, лоцирана во непосредна близина на автопатот Е-75 кон Табановце, на околу пет километри од границата со Србија, претставува една од клучните развојни локации во општината. Таа е стратешки позиционирана во близина на коридорите 8 и 10 и е урбанистички планирана за лесна и незагадувачка индустрија, трговски и сервисни дејности, складишта и сместувачки капацитети.
