И денеска на кочница е Законот за аудиовизуелни медиумски услуги со кој треба да се сопре пиратеријата на телевизиските програми во Македонија.
Пратеникот на ДУИ, Арбр Адеми никако да го стави законот кој е со европско знаменце на дневен ред на Комисијата за европски прашања.
Ова законско решение треба да ја спречи енормната пиратерија на канали од регионот и други странски канали, со што се прави директна штета и на корисниците, но и на телевизиите и на кабелските оператори. Со носење на овој закон треба да се регулира и телевизискиот пазар според комерцијални принципи. Ваквото законско решение треба да помогне во унапредување на правата на медиумските работници. Со законот за аудиовизуелни медиумски услуги треба да се регулира и правото за емитување кампањи од јавен интерес, особено од областа на здравствената заштита. За потсетување откако медиумите ја објавија информацијата дека министерот Азир Алиу размислува да ја напушти позицијата поради блокада на пакетот европски закони – на веб-страницата на Собранието експресно се појавија четири законски решенија на собраниската агенда. Но, меѓу нив не е и Законот за аудио и аудиовизуелни медиумски услуги кој помина прво читање во Собранието, но повеќе месеци е заглавен пред Комисијата за европски прашања со која претседава пратеникот од ДУИ, Арбр Адеми, кој не закажува седница на комисијата за овој Закон.
