Арбен Таравари ја депонираше оставката до премиерот Христијан Мицкоски. Го цени тоа што му дале можност да биде министер во значаен период за здравствениот систем, но го напушта владејачкото мнозинство. Сепак, остава подотворена врата за соработка во рамките на собранието со партиите на власт.
„Одлуката ја носам по внимателна, лична и професионална проценка, уверувајќи дека овој чекор е во најдобар интерес и за институцијата и за моите лични принципи. Ви благодарам за довербата и можноста да бидам дела од Владата во еден исклучително значаен период за здравствениот систем. Останувам отворен за соработка и поддршка во иднина секогаш водејќи се од јавниот интерес“, стои во оставката.
Оставката од Кабинетот на премиерот ќе биде препратена до Собранието каде пратениците само ќе ја констатираат, нема потреба од гласање. Во законодавниот дом, коалицијата Вреди достави до спикерот Гаши барање за промена на координаторот на пратеничката група. Наместо пратеникот Халил Снопче, за координатор на пратеничката група на Влен е избран пратеникот Беким Ќоку кој доаѓа од редовите на косовското движење Самоопределување.
• Пратеникот Беким Ќоку е назначен за координатор на пратеничката група на ВЛЕН.
• Заменици-координатори се пратениците Мерита Колчи Коџаџику и Аднан Азизи“, велат од Вреди.
• Додека сегашниот состав на Пратеничката група на ВЛЕН е како што следува:
1. Африм Гаши
2. Аднан Азизи
3. Беким Ќоку
4. Калтрина Беќири
5. Имерлије Салиу
6. Саранда Имери
7. Фериде Хаџиу
8. Мерита Колчи Коџаџику
9. Беким Сали
Од Алијанса, пак, уште нема барање за формирање пратеничка група. Неизвесно е дали АА ќе ги задржи петтемина пратеници, што е услов да имаат пратеничка група. Тие пред два дена одлучија да делуваат од опозиција и самостојно да настапат на претстојните локални избори. Владејачкото мнозинство во моментов официјално има 78 пратеници, а претставници од партиите на власт во повеќе наврати изјавија дека не само што нема да се намали туку е можно и да се зголеми.
