Скопскиот градоначалник Орце Ѓорѓиевски ужива голема доверба кај граѓаните, покажува истражувањето на јавното мислење спроведено од МКД.мк и агенцијата „Маркет вижн. Анкетата покажува дека хигиената е најголем проблем со кој треба да се справат градоначалниците и дека проектот „Безбеден град“ е добредојден и треба да се примени и во други градови.
Речиси половина од испитаниците односно 49 проценти одговориле потврдно дека се задоволни од работата на градоначалникот на Скопје, а 44,6 проценти се незадоволни.
Речиси две третини од испитаниците сметаат дека градоначалникот на Град Скопје почнал со исполнување на ветувањата дадени на локалните избори.
Истражувањето покажува дека граѓаните главно се задоволни од работата на градоначалниците во нивната општина (55,8%) и дека ги исполнуваат ветувањата. Сепак, сметаат дека најголем проблем е хигиената, на второ место е јавниот превоз, па урбанизацијата, паркингот, кучињата скитници, загадувањето на воздухот…
За проектот „Безбеден град“ на МВР, најголем дел од испитаниците (44,6 проценти), во чие место на живеење е применет овој проект, сметаат дека системот е одлична и потребна работа, а 31,2 отсто дека системот е добра работа, но потребни се измени, додека 20,4 проценти не го поддржуваат овој проект. Најчесто наведувана предлог промена за Безбеден град е примената на системот на повеќе места и во повеќе градови. Две третини од испитаниците во чие место на живеење не е применет Безбеден град (67,6%) ја поддржуваат идејата да се постави системот и во нивното место.
Мнозинството од испитаниците (83,7%) изјавиле дека се запознаени со предлозите на законот за забрана на пушење на јавни места. Од нив, 65,5% го поддржуваат овој закон, додека 26,8% не го поддржуваат.
Една третина од испитаниците се запознаени со предлозите на Законот за високо образование. Од нив, повеќе од половина го поддржуваат законот, 28,6 проценти не го поддржуваат, додека 18 проценти немаат став.
Анкетирањето било спроведено од 2 до 18 март со употреба на CAТI метода – телефонско анкетирање со помош на компјутер на примерок од 1.200 испитаници.
