Работна група од експерти од министерствата за дигитална трансформација, образование и внатрешни работи активно ќе ја следи состојбата со хибридните напади и дојави за поставени бомби во училиштата ширум државава. Министерот за дигитална трансформација Стефан Андоновски потврди дека групата веќе има развиено методологија што ќе даде резултат долг рок.
„Работна група која што ги разгледа проблемите со кои се соочува системот, начините со кој може да се заштити, но изработени се и методологии кои треба да се следат поради превентива на подолг рок“, изјави Андоновски
За последните дојави за бомби, според Андоновски од клучно значење била брзата и координирана реакција на институциите, но истакна дека министерството за дигиталзиација ќе продолжи да работи на подобрување на постоечките но и развивање на нови механизми за справување со хибридните напади.
„Постапувањето на министерството за образование, МВР и општините брзо и ефикасно делуваа и проблемот за рекордно време беше надминат, но се работи на причините за дојавите. Ние како министерство стоиме на располагање за идни соработки“, изјави Андоновски.
Реакцијата и итните мерки од страна на надлежните доаѓа откако минатиот петок беа регистрирани околу 120 дојави за поставени бомби во училиштата. Во истрагата со хибридните напади работат Бирото за јавна безбедност, Меѓународната организација за криминалистичка полиција, Интерпол и Агенцијата за криминалистичко разузнавање на Европската Унија. Само последните 3 години во земјава се регистрирани повеќе од 1200 дојави за лажни бомби.
