Четвртото издание на алтернативниот стрип-магазин „Тешка Машинерија“ ќе биде промовирано денеска во „Цреша бар“ во Скопје. Станува збор за независен стрип-магазин којшто во изминатите две години бележи континуиран развој, прераснувајќи од фанзин со 16 страници во издание од 72 страници.
Како што информираат организаторите, основна цел на „Тешка Машинерија“ е поддршка и афирмација на млади стрип-автори, сценаристи, илустратори и рецензенти, како и поттикнување на авторскиот и алтернативен уметнички израз.
Во најновото издание свои дела објавуваат стрип-авторите Александар Танчевски – Танчо, Методија Стојановски, Тиа Василеска и Владимир Благојевиќ – Владодлак, како и илустраторите Тијана Петковска – Тијанска, Ивана Атанасовска – Huespill, Александар Сидовски – Сидо и Јован Терзиоски – Јоки. Рецензијата е на Ивица Дукоски.
Магазинот содржи повеќе жанрови, меѓу кои научна фантастика, епска фантазија, хорор, комедија и други авторски форми на стрип-изразување.

