ДУИ повторно се дрзна да коментира одлуки на Уставниот суд, очигледно Али Ахмети сака да биде над уставниот поредок. Сега им пречи одлуката на уставните судии да се укине одобрението за основање на приватното средно училиште „Медресеја Иса Беу“ во скопско Кондово. Интегративците реагираат дека таквата одлука била антиуставна и во обид да го политизираат и овој случај, велат дека била удар врз исламската верска заедница во државава.
-Оваа одлука претставува директен напад врз верската слобода, врз достоинството на муслиманската заедница и врз едно право што беше добиено како исправка на историската неправда за време на претходната влада. Наместо да протестираат, тие молчат. Наместо да поднесат оставка, тие се правдаат. Тие не се претставници, туку послушни вазали на власт која повторно го активира проектот за еднонационална држава, без место за другите, велат од ДУИ.
Од Вреди велат дека ова е уште голем пораз за Али Ахмети и неговата партија, односно дека ова средно училиште основано на протиуваставен начин било само со цел собирање политички поени пред изборите.
-Ова е личен пораз на Али Ахмети и неговата клика, кои секогаш си играа со верските чувства на Албанците, само за теснопартиски политички интереси. Денес вистината излезе на виделина – медресата никогаш не било акредитирано на законит начин. ДУИ ја користеше во предизборни кампањи, исто како што ги користи сите симболи, чувства и потреби на Албанците – за да ги изманипулира, велат од Вреди.
Според познавачите вавките потези на ДУИ се и повеќе од очекувани и веќе редовен декор откако станаа опозиција, иако јасно е дека одлуката на Уставниот суд целосно е согласно законите.
-Секогаш ДУИ носи политички одлуки без да ги земе во предвид уставните одредби на државата. И вчерашната одлука на Уставниот суд донесена за укинување на средното училиште со верзки обреди е согласно Уставот и согласно законот за средно образование, односно согласно амандманот седум од Уставот и член седум од законот за средно образование, изјави Фаризи.
Политичкиот аналитичар Лулзим Фаризи потенцира дека овие потези од ДУИ, може да ги очекуваме и во наредниот период.
-ДУИ секогаш кога ќе им паднат нивните одлуки, односно секогаш противуставно и противзаконски, тие ќе почнат да се жалат пред народот демек државата, Владата работи спротивно на интересите на Албанците, а во конкретниот случај против верниците кои припаѓаат на исламската верска исповест, изјави Фаризи.
Ова не е прв пат интегративците директно да се мешаат во работата на Уставниот суд, претходно протестираа со поставени шатори бидејќи уставните судии решија да ја оценуваат уставноста на Законот за јазици. Инаку судот оцени дека дека владината одлука е незаконита и неуставна, бидејќи Владата дала согласност, односно дозволила Исламската верска заедница (ИВЗ) да биде основач на средно училиште, гимназија.
Матеја Петровски
