Носителот на листата за советници на Коалицијата за зелена иднина во Општина Карпош и копретседател на зелената партија ДОМ, Александар Анѓушев, во видео обраќање заборува за воведување на брз и фер систем на локална поддршка што ќе им служи на граѓаните секој ден, а не само пред избори, стои во соопштението на Демократска обнова на Македонија кое МИА го пренесува интегрално.
„Карпош мора да биде општина за живеење, не за преживување. Политиката има смисла само кога стои до човекот во секојдневието, а не само пред избори,“ изјави Анѓушев, додавајќи дека позицијата на коалицијата е хумана локална грижа како политички принцип, не како привилегија за одбрани.
Како клучен инструмент, Анѓушев го најави мобилниот концепт за помош по повик — услуга со јавно пријавување, јасни правила и еднаква достапност во сите населби.
„Нудиме мобилен концепт за помош по повик — кратка, но суштинска поддршка: набавки на лекови и намирници за постари лица, придружба до лекар, како и грижа за мали деца кога на семејствата им ‘гори’ со работа, здравје или итни обврски. Најавуваме локална солидарност, со јавно пријавување, јасни правила и еднаква достапност во сите населби“, вели Анѓушев
Во пораката кон жителите на оваа скопска општина, носителот на листата за советници на Коалицијата за зелена иднина во Општина Карпош и ко-претседател на зелената партија ДОМ, ветува дека „Карпош ќе биде општина што ќе стои покрај сите вас.“
