Граѓаните во државава јадат безбедна храна, порачува Агенцијата за храна и ветеринарство (АХВ) која и оваа година ја поддржа кампањата на ФАО за одбележување на Светскиот ден на храната, 16 Октомври. Според АХВ, храната постојано е под надзор, минува низ редовни и вонредни контроли и низ многубројни мониторинг програми.
-АХВ како институција е дел од синџирот за контрола на безбедноста на храната од домашно производство и од увоз, водејќи сметка храната редовно да се контролира во рамки на редовните и вонредните контроли и многубројните мониторинг програми чии досегашни анализи потврдуваат дека македонските граѓани јадат безбедна храна, наведува АХВ.
АХВ се придружи на настанот под мотото „Рака за рака за подобра храна и подобра иднина” што денеска го организираше ФАО во Паркот на франкофонијата. Претставници на АХВ на граѓаните им поделија едукативен материјал со совети за безбедна храна – флаери, лифлети и торбички.
-ФАО во рамки на Светскиот ден на храната годинава повикува на глобална соработка за создавање мирна, одржлива, просперитетна и безбедна иднина со храна. Со заедничка работа, низ владите, организациите, секторите и заедниците, активно се работи на трансформирање на земјоделско-прехранбениот сектор во насока на обезбедување на услови, секој граѓанин да има пристап до здрава исхрана, живеејќи во хармонија со планетата, велат од АХВ.
