Агенцијата за храна и ветеринарство по повеќегодишна пауза започна со превентивна вакцинација против антракс кај говедата, овците, козите, копитарите и свињите. Акцијата се спроведува согласно Годишната наредба за здравствена заштита на животните за 2025 година („Службен весник на Македонија“ бр. 54/25 и 211/25).
Вакцинацијата опфаќа населени места во епизоотиолошките единици Велес, Зајас, Прилеп, Пробиштип и Сарај, а треба да заврши најдоцна до 17 ноември. Вакцината „Anthrax Vaccine“ е веќе набавена и дистрибуирана до надлежните ветеринарни друштва во регионите каде што се спроведува превентивната кампања.
Трошоците за вакцинацијата се покриени од Програмата за користење на средства за здравствена заштита на животните за 2025 година.
Антраксот е сериозно бактериско заболување предизвикано од Bacillus anthracis, која формира спори и најчесто ги погодува домашните и дивите животни. Иако ретко, луѓето може да се заразат преку директен или индиректен контакт со инфицирани животни, преку кожата, вдишување или цревна апсорпција.
Од Агенцијата потсетуваат дека болеста генерално не се пренесува од човек на човек, но спорите на бактеријата можат да опстојат во животински производи и во почвата со години, поради што редовната вакцинација и превенцијата се од клучно значење за заштита на здравјето на животните и луѓето.
