Премногу долго граѓаните се соочуваа со институции кога за едноставна услуга беа потребни денови, недели или месеци. Премногу долго се создаваше чувство дека системот е бавен и неефикасен, посочи премиерот Христијан Мицкоски на денот на јавната администрација.
Мицкоски истакна дека јавната администрација со години била дел од систем, кој погрешно бил поставен и погрешно се развивал, но и дека веќе една година засилено се работи на реформите за создавање на модерна и ефикасна администрација.
-Нашата задача е да изградиме јавана администрација која ќе биде сервис на граѓаните, а не бирократска пречка пред нивните потреби. Администрација која ќе биде препознаена по брзината на услугата, по односот, по професионалноста и ефикасноста во решавањето на проблемите, рече премиерот.
Министерот за јавна администрација Горан Минчев, посочи дека благодарејќи на реформите коишто започнаа пред 12 месеци, Македонија е на добар пат да изгради професионален и ефикасен апарат на администрација.
-Изминатите 12 месеци беа период на интензивна работа, но и период во кој реформите ја добија својата институционална форма и видливи резултати. Период во кој не зборуваме само за промени, туку период на нивно остварување и вградување во институции, изјави министерот.
Минчев посочи дека спроведувањето на реформите било олеснето со формирањето на Реформскиот совет, со кој раководел премиерот лично.
Шефот за соработка на Делегацијата на ЕУ, Штефан Худолин, порача дека јавната администрација има потреба од постојано усовршување и реформирање.
-Интегративниот процес е организиран во поглавја и кластери, но ниту еден од нив не се однесува на јавната администрација. Нема поглавје и кластер за јавната администрација. Бидејќи таму реформите не завршуваат, тоа е основниот принцип не само на пристапниот процес, туку на константанта заложба са постојан напредок и усовршување на администрацијата, посочи тој.
Денот на јавната администрација беше воспоставен минатата година, со што беше означен почетокот на реформите. Годинава настанот беше одбележан под мотото – доверба, интегритет, резултати: темели на модерна и европска јавна администрација.
Срѓан Ивановиќ
