Агенцијата за аудио и аудиовизуелни медиумски услуги (ААВМУ) ги осуди заканите упатени кон новинарот Драган Павловиќ Латас од страна на градоначалникот на Струмица, Костадин Костадинов, објавени на социјалната мрежа „Фејсбук“.
Во соопштението ААВМУ потсетува дека политичарите и носителите на јавни функции имаат обврска да бидат пример за достоинствена и одговорна комуникација.
Агенцијата предупреди дека изјави кои поттикнуваат омраза можат да имаат сериозни последици и да доведат до дела мотивирани од омраза.
-Апелираме да се почитува слободата на медиумите и новинарите. Доколку политичарите имаат забелешки на медиумските содржини, постојат институционални механизми преку кои можат да реагираат, се наведува во соопштението на ААВМУ.
Случајот се однесува на објава на градоначалникот на Струмица, Костадин Костадинов, на „Фејсбук“, во која тој упатува закани кон новинарот Драган Павловиќ Латас.
Причината за реакцијата на Костадинов е поврзана со изјава на Латас во која тој го споменува таткото на Костадинов.
