Македонија на врвот како најнапредна во реформската агенда. Со реформи во образованието и дигитализацијата до европски пари. Потврда за успехот пристигна и од Европската Унија. Денеска Европската Комисија ни одобри најмногу пари или 65,7 милиони евра од Планот за раст за Западен Балкан. Во Македонија, оценетите реформи вклучуваат мерки за подобрување на финансирањето на основното и средното образование и мерки за проширување на пристапот до дигитална инфраструктура и ИТ опрема во училиштата. Од предвидените 65,7 милиони евра, 30,6 милиони евра ќе бидат префрлени во државниот буџет, додека преостанатите средства се достапни за инвестициски проекти преку Инвестициската рамка за Западен Балкан.
„Средствата што се наменети за Инвестициската рамка за Западен Балкан, откако ќе бидат одобрени од одборот, ќе поддржат инфраструктурни проекти во одржлив транспорт, чиста енергија, дигитален развој и развој на човечки капитал. Проектите ќе се спроведуваат во тесна соработка со партнери од Западен Балкан и меѓународни финансиски институции“ – ЕВРОПСКА КОМИСИЈА.
Европската Комисија одобри 159 милиони евра за Македонија, Албанија и Црна Гора во рамки на Програмата за реформи и раст. Најмногу пари добива Македонија – 65,7 милиони евра, за Албанија следуваат 49 милиони, а за Црна Гора 44,2 милиони евра. Овој потег следи по третото барање за исплата и позитивната оценка на Комисијата за направените реформски чекори спроведени во областите образование и дигитализација во Македонија и деловна конкурентност и иновации во Албанија и Црна Гора.
Со ова, паѓаат во вода обвинувањата на опозициската СДСМ дека Македонија доцни со спроведувањето на реформите. СДСМ постојано критикува дека повеќе од две години не е направен значаен напредок во исполнувањето на реформските обврски, додека роковите за нивна реализација се при крај.
Со ова одобрување за исплата, вкупниот износ ослободен од оваа програма достигнува 212,8 милиони евра за Албанија, 89,3 милиони евра за Црна Гора и 142,1 милиони евра за Македонија.
Планот за раст за Западен Балкан беше усвоен во 2023 година, со цел земјите-партнери од регионот да имаат придобивки од членството пред нивното пристапување кон ЕУ. Тој треба да ги интегрира државите во Единствениот пазар на ЕУ, да ја унапреди регионалната економска соработка, да ги продлабочи реформите поврзани со ЕУ и да го зголеми претпристапното финансирање. Крајната цел е забрзување на процесот на проширување и растот на нивните економии.
