Пазарните инспектори тргнаа во контрола на трговците со вештачки ѓубрива. Ќе се проверува дали се применуваат ограничените маржи во трговијата.
Државен пазарен инспекторат апелира до сите економски оператори – трговци на големо и мало – да ги почитуваат донесените одлуки. Мерките ќе важат до 31 мај годинава.
Контролите ќе бидат насочени кон доследна примена на владините мерки: како највисоки цени во трговијата на големо на неорганските ѓубрива се утврдуваат цените што важеле на 15 април 2026 година, намалени за 10 проценти; највисоката бруто-профитна маржа во трговијата на големо и мало на неорганските ѓубрива се ограничува до 5 проценти; додека кај органските, органо-минералните ѓубрива, биостимулаторите и подобрувачите на својствата на почвата маржата се ограничува до 10 проценти, информираат од Инспекторатот.
Дополнително, ќе се контролира и обврската за континуирано снабдување на пазарот со вештачки ѓубрива. Трговците на мало се должни месечно да обезбедуваат и продаваат најмалку 70 проценти од просечната количина што ја набавиле во 2026 година, додека трговците на големо треба да ги снабдуваат малопродажбите со најмалку 70 проценти од просечно продадените количини.
