Родителите на жртвите во дискотеката „Пулс“ во текот на судењето ќе слушнат од што точно и како загинаа нивните деца. Овој одговор го добија дел од нив кои изутрината дојдоа во Институтот за судска медицина во Скопје на средба со директорот, Александар Станков. Тој им објаснил дека Институтот не смее да дава никакви податоци за извршените анализи поврзани со нивниот дел од работата во случајот, бидејќи тие анализи се дел од доказната постапка која ќе биде презентирана пред судот. Прашањата што ги мачат родителите се дали Институтот направил токсиколошки анализи и дали е утврдено присуство на цијанид во телата на жртвите, како причина за смртта. Александар Наунов, татко на Надица Наунова, која загина во пожарот, вели дека анализите се направени и сите материјали се предадени во Обвинителството.
Дојдовме, ни објаснија дека се е дадено во обвинителство. Направени се сите токсиколошки анализи и дека ќе чекаме на вештачењето во судот да се изјаснат. Кога ни починаа децата тие земале примероци од нив од крвта и од органите но немало машина за испитување на токсични материи. Сега има машина, испитано е се и предадено е во обвинителство, вели Александар Наунов, претседател на Здружението на граѓани „16 март 2025“.
По средбата и директорот Станков потврди дека на родителите им било објаснето што се е направено и зошто сега не може да се информираат за вештиот наод којшто ќе биде доказ во судската постапка.
Поразговаравме обајснето им е се што треба досега да се објасни. Како што и претходно дадов изјави, се што е побарано од нас е завршено и сите докази ќе бидат јавно презентирани во судската постапка. Мислам дека луѓето разбраа одредени работи, ја разбраа нашата работа каква е, колку можеме и што можеме да се направи и име јасно дека се ќе биде јавно во текот на судската постапка, вели Александар Станков, директор на Судска медицина.
На ова му претходеше сомнеж и притисок од семејствата на жртвите околу причините за смртта и начинот на кој се води истрагата за трагедијата. Родителите подолг период бараа појаснување дали се направени сите потребни анализи, особено токсиколошки, бидејќи постоеле шпекулации дека можно е труење со одредени супстанци.Родителите и претходно оствариле средба со директорот на која им било истото кажано – дека информациите од анализите се дел од вештиот наод кој ќе сгане неупотреблив, ако е објавен пред да се изведе како доказ. Во меѓувреме на големото судење за Пулс исказ даваат сведоци на обвинителство. Во овој процес се обвинети 35 физички и три фирми, меѓу кои сопственици, блиски на сопствениците, инспектори, поранешни министри и припадници на обезбедувањето. На почетокот на судењето, сите се изјаснија дека не се чувствуваат виновни и ја оспорија причинската врска помеѓу нивните дејствија и трагичниот пожар.
