Тековните состојби, предизвиците и развојните приоритети на општините, финансиската стабилност, инфраструктурните инвестиции и зајакнувањето на локалните капацитети се темите на кои денеска разговараше министерот за локална самоуправа, Златко Перински, со градоначалниците на Валандово и Неготино, Ѓоко Камчев и Марија Нацева, во рамки на караванот „Каде што срцето е дома“.
Како што информираа од Министерството за локална самоуправа, во Валандово, министерот Перински и градоначалникот Камчев ги разгледале состојбите на локално ниво, при што посебно бил истакнат процесот на ажурирање на базите на даночни обврзници, мерка која треба да доведе до зголемување на сопствените приходи и подобрување на финансиската одржливост.
Преку јавните повици за капитални инвестиции, во општината се реализираат пет проекти со вкупна вредност од 107.038.333 денари. Градоначалникот Камчев посочи дека поддршката од Министерството игра важна улога во локалниот развој и дека со јасна координација и конкретна поддршка може да се обезбеди реален напредок и подобар квалитет на живот.
Во Неготино, средбата на министерот Перински со градоначалничката Марија Нацева и општинската администрација била посветена на развојните приоритети и меѓуопштинската соработка, како и на реализацијата на значајни капитални вложувања.
Општината, како што се наведува во соопштението, работи на два инфраструктурни проекти за реконструкција на тротоари, во вредност од над 4 милиони денари, започнување на проектот „Elder-Care“ преку Интеррег програмата со Грција, вреден 128.249 евра, реализација на 13 проекти поддржани со 200.288.639 денари обезбедени преку јавните повици.
Според градоначалничката Нацева „Elder-Care“ ќе донесе значајни подобрувања во здравствените услуги. Проектот предвидува отварање медицински кабинет за рехабилитација, набавка на опрема, амбулантно возило, ултразвучни и ехо апарати, како и опрема за реанимација.
