Македонската радио телевизија ќе спроведе интерна истрага и ќе отпочне дисциплинска постапка за да утврди кој дозволил да се емитува детска песна со која се воспева “Голема Албанија“. Ова ќе му го наложи Програмскиот совет на директорот на МРТ.
Ова следува откако Агенцијата за аудиовизуелни медиусмки услуги извврши вонреден надзор при што утврди дека Вториот програмски сервис односно МРТ2 го прекршил Законот за аудио и аудиовизуелни медиумски услуги.
Надзорот бил спроведен по службена должност и се однесувал на емитување од 28 март, во рамки на музичката програма „Билбилите на Кораб“. Со него се констатира дека уредничкиот тим на МРТ 2 треба да понесе одговорност.
„Надзорот покажа дека… емитуваната содржина поттикнува и шири нетрпеливост врз основа на национална и етничка припадност преку иредентистички симболи и експлицитни политички пораки за промовирање на моноетнички, иредентистички „аманет“ за обединување на територии“ се вели во заклучокот на Извештајот на ААВМУ.
Инаку спорната содржина беше емитувана во петокот кога во рамки на детски фестивал, 13 годишно девојче изведе песна насловена „Албански територии“ а беше облечено со маичка со карта на Голема Албанија. Во стиховите отворено се пееше за територијални претензии и кон Македонија, и кон Грција, кон Србија, кон Црна Гора.
