Во пресрет на Денот на правосудството, министерот за правда Игор Филков и претседателот на Управниот суд, Бурим Сејдини, потпишаа меморандум за соработка, со кој се воспоставува рамка за дигитално поврзување и унапредување на електронската комуникација меѓу институциите преку софтверската платформа ЕПУС.
Целта на меморандумот е да се обезбеди побрзо, побезбедно и поефикасно водење на управните спорови, особено во постапките во кои Министерството за правда се јавува како тужена страна. Со неговата примена се овозможува целосна дигитализација на размената на документи и информации, што, како што посочуваат, значително ќе придонесе за намалување на административните процедури и забрзување на судските процеси.
Преку платформата ЕПУС ќе се овозможи електронска достава на тужби, одговори, жалби, судски одлуки и други акти, како и нивно интегрирање во електронско досие на предметот. Дополнително, системот овозможува навремено известување за сите процесни дејства, со што се зголемуваат транспарентноста и правната сигурност за сите учесници во постапките.
Соработката, како што информираат од Министерството за правда, ќе се реализира во согласност со важечките законски прописи, вклучително и законите за управни спорови, општа управна постапка, судови, електронско управување и заштита на личните податоци. Особено внимание ќе се посвети на безбедноста и доверливоста на податоците преку примена на највисоки технички и организациски стандарди.
Министерството за правда ќе назначи овластени лица за работа со платформата, а Управниот суд ќе обезбеди техничка поддршка, пристап и обука за нејзино користење.
Овој меморандум не создава финансиски обврски за страните, туку претставува израз на заедничка заложба за модернизација на правосудниот систем и унапредување на институционалната соработка.
Од Министерството за правда посочуваат дека со овој чекор институциите прават значаен исчекор кон дигитализација на правосудството и подобрување на услугите кон граѓаните и правните субјекти.
