Со целовечерен концерт на ансамбл „Македонија“ вечерва ќе почне серијата настани по повод одбележувањето на 19 години од постоењето на Универзитетот „Гоце Делчев“ – Штип.
Концертот ќе почне во 19 часот во Мултимедијалниот центар на Економскиот факултет, а пред публиката ќе бидат изведени: „Седнал Марко“ – соборски ора и песни од етничкиот предел Средорек, Жеглигово и Славиште, „Вено Пиле“ – вокална изведба од етничкиот предел Жеглигово, „Излегол Селман“ вокална изведба од етничкиот предел Жеглигово, „Каршијак“ – соборски ора и песни од етничкиот предел Скопска Блатија, „Јанино“ – оркестарска изведба, „Малешевска“ – оркестарска изведба, „Чангулово“ – соборско оро од етничкиот предел Малешево, „Шетнала се Јана“ – соборски ора и песни од етничкиот предел Пијанец.
За 26 март исто така во Мултимедијалниот центар закажана е Ораторска вечер, а на 27 март ќе се одржи Свечена академија.
-Патрониот празник на Универзитетот „Гоце Делчев” – Штип претставува значаен чин за одбележување на вредностите врз кои се темели нашата академска заедница и миг за заедничко чествување на улогата на Универзитетот во унапредувањето на високото образование, науката и општествениот напредок. Вашето присуство на овој свечен настан, ќе ни претставува особена чест – наведува во поканата проф. д-р Дејан Мираковски, ректор Универзитет „Гоце Делчев” – Штип.
На 30 март во Свечената сала во Ректорат ќе се оджи промоција на доктори на науки.
Во најавата се нагласува станува збор за низа настани кои го обединуваат академскиот и културниот живот на Универзитетот, со учество на професори, студенти и гости од земјата и странство.
