Трошоците во градежништвото за нови објекти за индивидуално домување во четвртото тримесечје од 2025 година во однос на претходното тримесечје намалени се за 0,4 проценти, трошоците за материјали за 1 процент, а за 1 процент зголемени се трошоците за вработените.
Во последниот квартал лани, во споредба со истиот квартал од претходната година, трошоците во градежништвото за нови објекти за индивидуално домување бележат намалување од 0,5 проценти, а намалени се и оние за материјали за 1,1 процент. Зголемување од 0,8 проценти има кај трошоците за вработените.
Според ДЗС, трошоците во градежништвото за нови објекти за индивидуално домување, од 1. до 4. квартал во 2025, во однос на истиот период од 2024 година, намалени се за 0,4 проценти, трошоците за материјали за 0,3 проценти, а трошоците за вработените за 0,6 проценти.
Индексите на трошоците во градежништвото за нови објекти за индивидуално домување се наменети за преиспитување или мониторирање на трошоците направени од градежните претпријатија при изведувањето на процесот на изградба на нови објекти за индивидуално домување. Главни корисници на податоците за индексите на трошоците во градежништвото за нови објекти за индивидуално домување се градежните претпријатија, кои се повикуваат на движењето на трошоците во градежништвото во калкулациите при склучувањето на градежните договори.
