По 13 години пауза, продуктоводот, цевката по која минуваат нафтата и другите нафтени деривати од Солун до Скопје, е подготвен за работа, завршија сите технички контроли, информираше министерката за енергетика Сања Божиновска.
Таа присуствуваше на последната техничка контрола и верификација на мерниот систем на продуктоводот преку кој ќе се транспортира дизел гориво од рафинеријата во Солун до рафинеријата ОКТА во Скопје. Со успешно реализираната проверка се потврдени исправноста, прецизноста и целосната функционалност на системот, со што се исполнети сите технички и контролни предуслови за негово ставање во употреба.
Министерката Божиновска истакна дека техничката исправност и точноста на мерењето се клучни предуслови за безбедно и транспарентно функционирање на енергетската инфраструктура.
– Ова е значаен чекор кон воспоставување сигурен и модерен систем за снабдување со деривати. Прецизното мерење, контролата и меѓународната верификација значат доверба, стабилност и долгорочна енергетска сигурност за државата, нагласува Божиновска.
