Трендафилов се обидува да гради политичка кариера преку конфронтација во име на трудот на работниците. Пратеникот на ВМРО-ДПМНЕ, Бојан Стојаноски, упати остра критика до раководството на ССМ, обвинувајќи го за политички популизам.
Тој порача дека власта не бега од дијалог за минимална плата, но дека тоа мора да се договара институционално меѓу работодавачите и синдикатите, со владата како посредник. Одговори и на прозивките зошто кога ВМРО-ДПМНЕ било во опозиција давало поддршка на ССМ, а денес е поинаков случај.
Стојаноски појасни дека пред неколку години барањето на ССМ било линеарно покачување од 2.800 денари по вработен во јавниот сектор, а сега покачувањата кои се направени од актуелната власт се значително поголеми. „Ние како опозиција поддржувавме борба за повисоки плати затоа што имаше неправда. Денес, како власт, ние не ветуваме на улица, ние реализираме преку договори“, порача Стојаноски.
