Три лица од Скопје се уапсени поради сомнеж дека спроведувале активности на Исламска држава, како и за набавка на оружје. На тројцата им е одреден притвор.
„Според досега прибраните докази, осомничените дејствувале организирано и координирано како група со заедничка идеолошка определба заснована на радикалниот ислам. Се сомничат дека собирале пари од земјава и од странство за пропаганда и активности на Исламската држава“, соопштија од Обвинителството за гонење организиран криминал и корупција.
Биле извршени и претреси во домовите на осомничените и во други простории во Скопје, при што полицијата запленила огнено оружје, електронски уреди и други докази.
Обвинителството соопшти дека постои сомневање оти уапсените лица се организирале за одмазда на своите браќа, кои во 2025 година беа обвинети и осудени за делото терористичка организација.
