Едните прифатија, другите тактизираат со конечна одлука. Откако вчера Конфедерацијата на слободни синдикати го прифати предлогот на Владата за покачување на платите на 7.800 работници во управата и правосудните органи, органите од Синдикатот на УПОЗ се уште анализираат. Претседателот на УПОЗ, Трпе Деаноски првично го прифати предлогот, иако според него биле понудени плус 8%, наместо бараните 10% и покрај тоа што во порастот на платите ќе влијаe и зголемувањето на минималецот. Тој рече дека поради задоцнувањето од една година од нивното барање, членовите може и да не прифатат, а работниците можеби ќе бараат и повисоки износи од тоа што сега е понудено. Сепак, 95% од синдикалците се изјасниле „за“.
„Од досега пристигнатите изјаснувања, 95% од синдикалните организации се изјаснија дека барањето на Синдикатот на УПОЗ кое е прифатено од страна на Владата за зголемување на платите е поповолно и прифатливо. По изјаснување на сите синдикални организации, Синдикатот на УПОЗ во текот на наредната недела, ќе оствари работна средба со претставниците на Владата на која ќе биде договорен опфатот и теркот на колективниот договор“ – велат од УПОЗ.
Од КСС пак велат дека уште веднаш ја прифатиле понудата, како што потенцираа без опструкции, без калкулации и без злоупотреба на работниците. Веќе прават подготовки за склучување на поединечните колективни договори.
Премиерот Мицкоски ја оцени средбата со УПОЗ како конструктивна и рече дека очекува одговор дали владиниот предлог е прифатлив. Тој вели дека им ги образложиле условите и правилата за покачување на платата за 40% во следните две години и неколку месеци. Доколку одговорот е позитивен, Мицкоски најави дека од понеделник ќе почне подготовката на документот на синдикалниот договор.
Пресметките покажуваат дека ако некој административец во управата и правосудните органи сега има плата од 35 илјади денари, со покачувањата во три наврати, во 2028-ма ќе заработува речиси 50 илјади денари месечно.
Мицкоски најави и план за намалување на платите на над илјада функционери. Тој рече дека стратегијата на Владата е со постепено намалување на коефициентите, до крајот на мандатот, функционерските плати да се вратат на нивото пред зголемувањето од 78% во 2023-та година.
